أغسطس 07, 2023900 معلومة متنوعة ومفيدة، حول التغذية الصحية

 الجروح:

الجروح بشكل أساسي في منها نوعين أساسيين:

١- جرح مفتوح: وده بيكون ناتج عن قطع حصل في الجلد فبدأ يحصل إفرازات أو نزيف نتيجة القطع ده وبيكون ليه مجموعه من الاشكال منها السحجات والجرح القطعي و الجرح الوخزي وهنستعرض منها أكثر نوعين منتشرين.

٢- جرح مغلق: فيه جرح داخلي في الأنسجة الداخلية لكن لازال الجلد سليم مفيش فيه أي مشكلة وبيحصل نتيجة ليه نزيف وتجمع دموي تحت الجلد وده اللى بيغير لون الجلد ويخليه ازرق ودة الجرح اللي بنسميه كدمات.

 

أولا الجروح المفتوحة:

في أنواع كثير منها وهى كالتالى.

 

1-     السحجات :

·        الجرح يشتمل فقط علي الطبقة الخارجية من الجلد اللي احنا بنسميها (القشطة / الجلطة / الكحتة....) أيا كان انتوا بستموها اية.

و معناها إن الطبقة الخارجية اتكحتت من الجلد نتيجة لاحتكاك الجلد بجسم خشن، في الغالب ميبقاش معاها نزيف لأن الطبقة الخارجية من الجلد مش مليانة أوعية دموية لكن بيكون معاها إفرازات لسوائل لونها شفاف أو مصفر شوية ودة اسمه سائل البلازما plasma.

·        تكمن المشكلة الرئيسية للسحجات فى التلوث مش فى النزيف نهائي.

أتصرف ازاي في السحجات؟

·        أهم حاجة: الغسيل بالماء (نحط الجرح تحت الماء عشان نزيح أي أتربة أو ميكروبات) ولو حصل إن الأتربة مش بتتشال بالمية العادية، ممكن أستخدم معاها الصابون.

·        مفيش احتياج دلوقتي في المرحلة الأولي إني أستخدم كحول / بيتادين / مطهر المية الجارية هي أهم حاجة لتنظيف الجرح.

 

2-    الجروح القطعية:

·        مشكلة الجرح القطعي إنه بيبقي عميق بيدخل لطبقات كثيرة من الجلد وممكن ينزل لتحت الجلد عشان كدة ممكن يقطع معاه شرايين أو أوردة، فالنزيف بيكون غزير.

أتصرف ازاي في الجروح القطعية؟

·        الأولوية في هذا الجرح وقف النزيف، مش هفكر دلوقي في التلوث، لأن الأخطر واللي ممكن يودي بحياة المريض هو النزيف وهنقول نوقف النزيف ازاي في جزء لاحق بإذن الله.

·        أحيانا في الجروح القطعية بيكون النزيف سببه شريان أو وريد مش مشكلتنا دلوقي، دي مشكلة الطبيب إنما احنا بمنتهي السرعة هنوقف النزيف وننقل المصاب علي المستشفى فور حدوث المضاعفات زي الصدمة أو لقدر الله الوفاة.

المشاكل اللي ممكن تنتج عن الجروح بأنواعها المختلفة:

١-النزيف: فقدان كمية كبيرة جدا من الدم قد يؤدي إلي الصدمة ومن ثم الوفاة

٢-العدوي: دخول الميكروبات أو تعرض الجرح للتلوث لأن الجلد بمثابة حاجز بيحمي الجسم من دخول أي ميكروبات، ففي حالة وجود جرح بتدخل الميكروبات بسهولة للجسم وتبدأ تعمل عدوي.

٣- تدمير عضو ما: الجرح دة ممكن يؤدي إلى تدمير في عضلة أو عصب أو وريد أو شريان أو أي عضو مهم وبيكون ده حسب مكان الجرح وعمقه.

ثانيا الكدمة أو الجروح المغلقة:

بتحصيل لما تخبط في جسم صلب، فبحيصل تغير في لون الجلد نتيجة حدوث نزيف تحت الجلد (يبدأ الأول يحمر وبعد كدة يزرق وبعد كدة درجة الزرقان تزيد لحد ما يختفي خالص مع الوقت ان شاء الله لكن الجلد بيفضل سليم).

إسعاف الجروح المغلقة:

1-     بنحط عليه الماء البارد لكن مش بنحط ثلج بشكل مباشر.

2-     عايزين نحط ثلج، لازم نلفه في فوطة أو كيس جواه ماء لأن الثلج بشكل مباشر قد يؤذي الجلد ويسبب حروق ودمار في أنسجة الجلد.

3-     التبريد بيكون في أول ٢٤ ساعة من الإصابة بعد كدة ممكن أستخدم المياه الدافئة بعد مرور ٢٤ ساعة لأن دة هيساعد علي امتصاص الدم أو النزيف اللي تحت الجلد.

وديه كانت الإسعافات الأولية والسريعة لبعض أنواع الجروح والاصابات